1959 - Iersjte jeugdprinsepaar

1959.jpg

 

Vanaaf 1959 höbbe de Sjlaaibök hun iersjte Jeugprinsepaar:
Prins Peter I (Peter Aerts) en Prinses Ria (Ria Rompelberg).

Toine Linkens - beter bekind es Lappe Twajn vanwege zien sjtoffezaak - haw in 1958 (de Sjlaaibök besjtoonte toen dreij jaor) ‘t idee opgevat um de jeug in 1959 ‘n eige Prinsenpaar te geve. Väöl luij in de vereineging zaoge dat in dei tied neet zoe zitte umtot me binne de nog jông Sjlaaibök teväöl aandach aan ander zake môs geve. Minnigein dach tot ‘t idee gebore waor um te mislökke. Toine zat echter door en op eige koste kleijdde heer ‘t Jeugprinsepaar. Dat ging zoe.

Peter Aerts zaot op de lieger sjaol en op zekere daag woord heer oonder de sjaollès oet de klas gehaold want twie hiere môste häöm sjpreke. Toine Linkens en Sjoke Gulikers sjtoonte häöm in de gangk op te wachte en dao, beej ‘t Heilig Hartbeeld, woord häöm gevraog of heer Jeugprins van Amie wouw weure. Peter hoofde ziech neet te bedinke, heer hoofde ouch neet eve mèt thoes kontak op te neume, ‘t antwoord waor kort en direk: “Dat is good menier”. De awwersj van Peter waore op dat memint neet op de huugde van de vraog, laot sjtoon van ‘t antwoord, meh dat bleek gelökkig gein belemmering te zien. Einige tied later woord Peter nog ‘ns ‘ne kier oet de lès gehaold want d’r môs door Lappe Twajn ’n kesjtuum weure aangemete. ‘t Oeteindelek rizzeltaat moch d’r veur dei tied zien. ‘t Uniform pasde perfek en de sjeun ouch. Boe die sjeun vandan kaome vèlt neet mie te achterhole. Waal weite veer zeker tot ‘t geverfde sjeun waore die ‘t jaor daonao nao de volgende Jeugprins woorte doorgesjove en of dei gamin noe groeter of kleiner veut haw, dao woord neet lestig euver gedoon. In zaal Lemmelijn woorte Peter Aerts en Ria Rompelberg same es iersjte Jeugprinsenpaar van Amie oetgerope.

D’r waor in dei tied gein programma veur ‘n Jeugprinsepaar en ‘t oontbraok ouch aan jeugaktiviteite zoe wie die vandaag d’n daag door de jeugkemissie veur de jeug weure georganizeerd. ‘t Jeugprinsepaar moch mèt de Groete Prins, Urbain I, mètgoon nao Hoes Sievere. Peter moch dao aan de kinder appelesene oetdeile. Weijer ging ‘t Jeugprinsepaar mèt nao de kaffees in Amie: dat wèl zègke in ‘n heukske nao de karnevalsvierdersj zitte kieke en af en tôw ‘n gleiske limmenaad drinke, niks miejer en niks minder. Meh… de Jeugprins haw waal ‘ne eige Prinsewagel: ’n wegelke, dat woord getrokke door ‘ne pony van Van Oppen, waor sjpeciaal veur de Jeugprins verseerd. Prins Peter I heit dao in d’n optoch ‘n oonvergeteleke rit in gemaak. Neet allein umtot heer genoot van alle belangsjtèlling langks de sjtraot meh ouch van ‘t flesjke doonker beer dat veur häöm in ‘t kerke gereid waor gezat.

Prins Peter I haw geine eige Raod van Èlf. Nao de karnevalsdaag heit Peter zien leifiedsgenote benaderd en in ‘ne mum van tied waore d’r genoeg jônges die same ‘ne Raod van Èlf wouwe vörreme, want me voond ‘t nuij fenomeen ‘n geweldig succes. Vlak daonao woord in 1960 de iersjte Raod van Èlf veur de jeug gebore.

Vanaaf 1959 woord ‘t oetrope van ‘n Jeugprinsepaar ‘n vas programmaoonderdeil van de vereineging.

Hoeglöstighede

Sjteunbök

Programma