Euverige

1956 - Iersjte prins

Rie Limpens waor de iersjte Prins van de vereineging. Veur ‘t iersj in ‘t prèl besjtoon van de vereineging môs ‘ne Prins weure gekoze. Besjlote woord um oet de Raod van Élflede ´ne Prins te keze. Rie Limpens kraog de ier um de iersjte Prins van de Sjlaaibök te weure veur de karneval van 1956. Heer kraog 9 van de 11 sjtumme.

1961.jpg

Rie waor meuleneir en vermaolde d´n terf tot meil. Heer kaom beej bekkersj, boere en boeteluij aan hoes en waor beej ´n ederein beter bekind es De Meilwörrem. Rie waor ´ne jônge vent dei heel van plezeer make en beej miejer vereineginge van Amie lid waor. ´n Ech karnevalsfees viere waor d´r toen echter nog niet beej umtot de pesjtoer van destijds, Roebroeks, ziech daotege verzat. Volleges Rooms-Katheliek gebruuk gold namelek op de daag veur Asgoonsdag ‘n 40-oorsjgebed en dat kôs nao de opvattinge van de toenmaolige pesjtoer neet samegoon mèt “retteketet en haldikidee”. Pas väöl later, op 11 oktober 1956, waor definitief zeker tot in ‘t vervolg ech karneval gevierd kôs weure umtot de gebedscyclus door nuije pesjtoer Mertens verplaats woord nao de Keersjtied. ‘t Weerheel Rie neet devan um plezeer te make: op ’n goje daag woord in ‘t hols van de nach door Rie same mèt dreij kammeraote ‘n kar midde op sjtraot gezat en woorte de rajer d’r oonder oet gehaold. ‘n Sjtevig podium waor ‘t rizzeltaat. Oonderling dege ze ‘n wedstrijd wèh ‘t bèste zouw kinne sjpreke. Rie bleek de vlotste mojl te höbbe.

Rie heit op zien eige terrein de Prinsewagel (‘ne sjtrijdwagel oet de Romeinse tied) zien bouwe; veur de Sjlaaibök-Prins van vandaag d’n daag is ‘t ‘n verrassing wie de Prinsewagel d’r oet zuut. In de iersjte optoch waor ouch veur meziek gezörg: groete vèttônne van de bekkereij waore sierlek bekleid en waore good veur ‘n euverdônderend trômmelgerôffel. Nao aafloup van de optoch woorte die trômmele aan de Herremenie gesjoonke.

Este mèt Rie euver de Amiese karneval oet 1956 sjpriks vèlt heer regelmaotig in herhaling: “Veer hawwe wienig nudig um väöl plezeer te make en iech voond ‘t fantasties um Prins te zien”.

Zjubilea

Beej de Sjlaaibök weurt tradisiegetrouw nao de 10e Prins ‘ne Vorsj gekoze in plaats van ‘ne Prins. De Vorsj weurt gekoze oet de 10 Prinse die aan häöm veuraaf zien gegange.

Twie biezunder Prinse

1991.jpg
 
1991: Golfprins Ben I

Beej ‘t oetrope van Prins Ben I in 1991 hing de dreiging van ‘ne oorlog tössje Amerika en Irak in de loch vanwege “de kwestie Koeweit”. Beej de sjtart van “Desert Storm” kaom d’r vanwege de Nederlandse betrokkenheid heijbeej ouch ‘n emosjioneel reaksie vanoet de karnevalsweireld. De karneval môs “ingetoge” georganizeerd weure. Veur Amie ’n lestige käös: in naovolging van väöl zustervereineginge geine optoch en ander boeteaktiviteite óf ’n eige koersj vare? Nao lang euverlègk woord besjlote d’n optoch en ‘t sirrenaad door de herremenie aan ‘t Prinselek Hoes van ‘t programma te sjrappe.

Echter beej ‘t versjtrieke van “Desert Storm” kaome väöl luij weer tot bezinning betreffende ‘t aafbloze van de karneval. In Mesjtreech kaom d’r zelfs ’n komplete rivvelusie oonder ’t vollek: de luij wouwe waal degelek ‘ne optoch te hawwe. Oondanks de väöl teleursjtèllinge die de Amiese Prins van dat jaor môs verwèrreke vanwege ‘t viere van “’ne ingetoge karneval” waore de luij van Amie toch aktief mèt vastenaovond zelf. Beej ‘t aaftreije kraoge Prins Ben en Prinses Anjola de titel “Golfprinsepaar 1991”, mèt ‘ne golfsjtick es herinnering.

 
 
1990.jpg
 
1990: Sjtörremprins Fred I

Ederein waor d’r klaor veur, alle veurbereijinge waore getroffe, vereineging en vollek waore opgewermp. Karneval 1990 kôs beginne. ‘t Weir waor echter biezeunder sjlech op karnevalszoondag en veur karnevalsmaondag waore de weirsjverwachtinge zelfs nog erger. ‘ne Flinke en zjwoere sjtörrem woord veursjpeld. Alle weirsjtasjions gaove ’t dringend advies um gein boeteaktiviteite te organizere i.v.m. te verwachte hiel hoeg windsjnelhede. Veur Prins Fred I beteikende dit helaas geine optoch. Neet allein lieverde dat beej häöm ‘n groete teleursjtèlling op, meh ouch beej väöl luij die al weke bezig waore geweis mèt veurbereijinge van ‘t karnevalshoegtepunt: d’n optoch.

Es alternatief woord ‘n parade bedach in de Amyerhoof. Prins Fred I en ziene Raod van Èlf naome ‘n defilé aaf in de groete zaal van gemeinsjapshoes Amyerhoof, boe beej alle groepe en individueel verkleijde luij langks lepe. Prins, Raod en tôwgesjtruimp vollek kôste dit beoordeile, terwijl de luij die ´ne optochwagel hawwe gemaak woorte bezeuk in de loodse boe me weke haw gebouwd.

Beej ´t aaftreije kraog de Prins de titel mèt van
“Sjtörremprins Fred I-1990” es blievende herinnering aan dit oet noed gebore einmaolig defilé.