Diversen

Besjtuur

Marcel

Constant Leenders

Veurzitter: Marcel van Mulekom

Sikretaris: Constant Leenders

alt Fred
Penningmeister: Ronald Boesten Algemein besjtuurslid: Fred Stals
  Andre
Algemein Besjtuurslid: Nicole Meinke  Algemein Besjtuurslid: Andre van Wageningen

Raod van 11

In ‘t karnevalssezoen deent de vereineging miejer es ins akte de présence te geve. In die situwasies vertegewoordig de Raod van Èlf de vereineging en begeleidt ze ‘t Prinsepaar beej alle officieel aangelegenhede. Same mèt ‘t Prinsepaar is de Raod van Èlf ‘t vizitekeertsje van de vereineging. Ze môte daoveur good veur d’n daag kome en zien dan ouch gekleid in ‘n rokkesjtuum. Veur de Raod begint de karneval miestal es de res van ’t dörrep d’r nog neet aan dink: vanaaf november môte ze ‘n kier of twintig names de vereineging d’r op oet en op sômmige daag môte ze zelfs op ‘n sjtök of dreij á veer plaatse tegeliek versjijne. Zoewie geer zeet: ‘n behuurleke kondisie um dat te kinne volhawwe höbbe Raodslede waal nudig.

Mèt karneval drinke väöl luij minneg gleiske beer. Es lid van de Raod môste dao echter mèt oetkieke, want sjeigelend kinste noe einmaol neet ‘ne Prins begeleije of ‘n good veurbeeld geve. Alle drank weurt euveriges oet eige portemenee betaald.

Binnen de Raod van Èlf is ‘ne sirremoniemeister aanwezig. Heer is te herkinne aan de scepter dei heer altied beej ziech heit.

 

alt

 

Boete de dreij karnevalsdaag is de Raod ouch nog dèks aktief: dink mer ‘ns aan ‘t verkoupe van loter, “tuutsjes” roondbringe en ophole. Ouch boete ’t sezoen hawwe veer de nudige aksies; de oondertössje populair gewore vioeleaksie is dao ’n veurbeeld van.

 

Umtot de Raod ‘n gans jaor good môt kinne samewèrreke weurt ‘n leuke en gezèllige sfeer in de vereineging erg belangriek gevoonde. Tot de dames van de Raodslede dao hun sjteinsje aan beejdrage sjprik eigelek vanzelf.

De taak van de Raod van Èlf is de prizzentasie van de karnevalsvereineging in ’t volledig karnevalssezoen, en waal in Amie zèlf es boete dis gemeinsjap. Ze deent zörg te drage veur de prizzentasie van de vereineging in ‘t algemein.Tot häör taak huurt evezier de begeleijing van ‘t Prinsepaar en neume ze deil aan ‘t werk- en oettrèkprogramma.Daoneve assisteert de Raod ‘t besjtuur.

Volges ‘n opgesjtèlde wiekverdeiling zörrege de Raodslede veur de verkoup van loter, ‘t roondbringe van ‘t Sjlaaiblaad en ‘t ophole van de tuutsjes.Ouch verliene ze volges ‘n wèrreksjema assistensie beej de kemissie wagele/opbouw en hawwe ze tôwziech beej de kindermiddage.Van de Raod van Èlf weurt verwach tot ze deilneume aan de diverze aksies van de vereineging.

 

SAMESJTÈLLING KEMISSIE

Verantwoordelek besjtuurslede: Fred Stals

Lede van de Raod van Èlf:

Michael Derwort, Guido Habets, Robert Humblet, Sander Lemmens, Patrick Makatita, Marcel van Mulekom, Fred Stals, Johan van Herten, Steven Brauers, Stefan Ritzervelt, Roy Loyson, Marvin van Weert, Luuk Gulikers & Wilfried Hentzepeter 

Sjlaaiblaad

Oonder verantwoordelekheid van de kemissie Sjlaaiblaad keump vlak veur de karnevalsdaag, op ‘t Nuij Prinsebal, karnevalsgezèt "’t Sjlaaiblaad" oet, dat in Amie graties hoes aan hoes weurt versjpreid. Oongeveir veer persoene vörreme ‘n min of mie vaste redaksie die d’r veur zörg tot eder jaor ‘n Sjlaaiblaad oetkeump boe in op ‘n luchtig gesjreve meneer ‘t reile en zeile in Amie op de hak weurt genome. Op de iersjte plaats is ‘t de bedoeling tot de luij ‘ns good kinne lache euver de aangehaolde Amiese dörrepspôlletiek of de meneer boe op dat veur ‘t vootleech weurt gebrach. 

De kemissie bepaalt zelfsjtandeg vörrem en inhajd van ’t blaad, boe väöl teikeninge en foto’s beej weure gebruuk. Veur de luij die neet van alle typies Amiese gebäörtenisse op de huugde zien blijf nog genoeg euver um te lache es ze de ganse serie veersje möpkes doorneume, boe ‘t redaksieteam eder jaor tot euver de grenze nao op jach geit.

In ‘t Sjlaaiblaad weure netuurlek ouch de nuij Prinsepare en ‘t jaorleks programma van de dreij döl daag geprizzenteerd. ‘t Sjlaaiblaad is 'ne vörrem boemèt de karnevalsvereineging probeert ‘t Amies dialek oonder de bevolleking werrem te hawwe. De Sjlaaibök zien gruutsj d’r op tot ze eder jaor weer d’r in sjlage ‘t Sjlaaiblaad advertensieloos kinne oetgeve. Alle Sjteunbök sjtoon op ‘n apaarte pagina in de karnevalsgezèt vermeld.

In ‘t Sjlaaiblaad bevindt ziech altied ‘t oondertössje bekinde "tuutsje" dat versjeije daag nao ‘t oetbringe weer weurt opgehaold. ‘t "Tuutsje" weurt gevöld mèt ‘n vrijwèllige financieel beejdrage van de lezersj. D’n opbringks is besjtump veur de kranke dörrepsgenote die in dat jaor neet aan de karneval kinnen mèt doen.

Sjlaaimettetreffe

Sjlaaimettetreffe sjteit veur ‘t oonherkinbaar verkleijd roondtrèkke in Amie op de aovend van karnevalszoondag. De mies waanzinnige kreasies kinste dan in Amie tegekome, van luij allein of in groepsverband. D’r weure dèks mèt allerleij attribute situasies gekreëerd en shows opgeveurd boeste beej zouws zjwere totste mèt toneelsjpelers te make höbs.

Um twellef oor sjnachs weurt in eine van de Amiese kaffees oonder groete belangsjtèlling besjlis wèh "’t bèste" is, ouch al zien de oonderling versjèlle dèks erg klein. Die oonderling versjèlle weure mèt leuke prijze gewaardeerd. De kemissie Sjlaaimettetreffe zörg veur de totaal organizasie van ‘t Sjlaaimettetreffe.

Prinsekemissie

D’r zien hiel get Amiese hiere en dames die geir de rol van Prins of Prinsepaar van De Sjlaaibök zouwe wèlle vervölle. Heij prijs de vereineging ziech gelökkig mèt, umtot dit aanguuf tot de organizasie van de Amiese Karneval in gooj aarde vèlt en door väöl luij vanoet tradisie gedrage weurt.

‘t Prinssjap weurt echter door De Sjlaaibök neet zonder mie gezeen es ein of ander ierebäönsje. Prins en Prinsepaar dene toch hiel get in hun mach te höbbe om de periode van karneval good te kinne doorsjtoon en hun take nao behure te kinne vervölle. Dao maog toch ech neet te liech euver weure gedach: ‘t is ummersj hiel get miejer es in ‘n sjiek kesjtuum op ‘n verhuging bove ‘t volk oet te torene. De complexe organizasie en de väölheid van aktiviteite van De Sjlaaibök maoge tot aangeven.

'n Amies Karnevalsprinsepaar is neet allein ‘n jaor lang “ ‘t geziech” van De Sjlaaibök, ze guuf veural ouch leiding aan ‘t ganse karnevalsgebäöre boe beej ze vanaaf hunne figuurleke ivore tore toch veural in deens sjtoon van de ganse karnevalsvierende gemeinsjap. Neve ‘t vervölle van hun pliechte dene ze dit ouch in woord en gebaar volop te demonstrere, terwijl hun gedraag weurt bepaald door de vereinegingskadersj en de algemein geldende norme en weirde van de maatsjappij. Netuurlek oontvange ze beej ‘t oetveure van hun neet te oondersjatte take de volledige oondersjteuning van de vereineging in häöre ganse umvangk.

Biezeunder is tot ‘n Amies Prinsepaar dis take ‘n gans jaor deent te vervölle. Ze weure vief weke veur Karneval benump en geïnstalleerd en geve de daobeej behurende scepter allein mer aaf aan hun opvollegersj. Op dis meneer kin dit teike van wierdigheid dan ouch neet terechkome in neet-Prinseleke han!

Wie weurt noe iemes Prins van Amie?

In prinsiep kin edere inwoener van Amie dei aan bovesjtaonde voldeit heijveur in aanmerreking kome. Geld sjpeilt heijbeej gein rol, umtot de koste van de ganse organizasie en alles wat daobeej huurt door de vereineging weure gedrage. Dat wèl echter neet zègke tot de Prinsetaak noe gaar gein persoenleke koste mèt ziech mèt drage.

Edere inwoener van Amie, waal of gein Sjlaaiboklid, kin ‘t gans jaor door eine of miejer kandidate veursjtèlle. Dat kinne (oon-)getrouwde (ech-)pare zien, meh ouch oongetrouwde Prinskandidate. Vereiste heijbeej is tot ze de wèl en ‘t vertrouwe in ‘t oetoefene van hun tôwkômpstige take beej De Sjlaaibök bewus höbbe oetgesjproke of daovan in de praktijk höbbe bliek gegeve.

Alle kandidate weure in de Prinsekemissie, die besjteit oet versjeije ervare lede van de vereiniging, besjproke boenao via consensus of d.m.v. sjtumming ‘n käös weurt gemaak.

Kandidaatsjtèlling en käös dene netuurlek in ‘t groetste geheim te gebäöre. Ouch oonder ‘t verriechte van alle veurbereijinge is dit geheimhawwe ‘n iersjte zjwoer pliech. Beej oetlekke van dit geheim nump de prinsekemissie ziech ‘t recht veur de kandidatuur of benadering oongedoon te verklaore. Tot aan ‘t memint van oetrope blijf dit geheim beej ‘t beperk aantal lede van de prinsekemissie beröste! De prinsekemissie lègk v.w.b. hun besjlissinge allein mer verantwoording aaf aan ‘t besjtuur en deit dat in naam inkel nao de installasie van de gekoze kandidaat.

Um in aanmerreking te kome veur ‘t Prinssjap gelde bepaalde zake van aandach, boevan d’rsj heijoonder ‘n hampfel genump weure:

Es iersjte môt de kandidaat woene binne de dörrepsgrenze van Amie en ‘n bepaolde bekindheid höbbe in dis gemeinsjap. ‘t Sjpreke van ‘t (plaatselek) dialek is daobeej ‘n vereiste. Ouch deent de kandidaat ‘n zeker verdeenste binne de Amiese gemeinsjap te höbbe. ’t Is gunstig es de kandidaat lid is van ein of miejer plaatseleke vereineginge. Netuurlek deent heer karnevalesk te zien ingesjtèld en De Sjlaaibök ‘n werrem hart tôw te drage. ‘t Is vanzelfsprekend tot een eventueel lidmaatschap beej ‘n ander karnevalsvereineging es De Sjlaaibök edere kandidatuur oetsjlut.

Beej veurkäör dene kandidate aanhang te höbbe in alle lage van de Amiese bevolleking en te besjikke euver redeleke tot gooj kommunikatieve vaardighede. ‘t Sjprik vanzelf tot allein mèt ‘n gooj gezoondheid en ‘n bepaald oethajdingsvermoge de nudige take door ‘t tôwkômpstig Prinsepaar of Prins vervölt kinne weure.

‘n Dèkser gehuurde misvatting is tot kandidate in de veurmalige gemeinte Amie geboren zouwe môte zien. Dat kint vandaag d’n daag besjlis geine noedzaak mie zien. Ummersj, es kandidate voldoen aan bovegesjtèlde, bewieze ze daomèt hun lidmaatsjap en draagkrach in de gemeinsjap Amie.

De prinsekemissie dreug dus op de iersjte plaats de zörg veur ‘t vinde van ‘n gesjik Groet Prinsepaar. Daoneve valle alle daomèt samehangende gebäörtenisse oonder häör verantwoording zoewie ‘t veurbereije van ‘t Prinsepaar op häör tôwkômpstige take, ‘t Protokol beej de beneuming en installasie, ‘t veurbereije van de Inaugurasiespeech, de Prinselijke Proklemasie en gangk zoe mer door.

Eder èlfde vereinegingsjaor heit de kemissie ‘n sjpeciaal taak:

de kemissie deent dan oet de tien veurige Prinse ‘ne Vorsj te keze oet de veuraafgaonde tien Prinse. De Vorsj krijg neve zien take es Prins ouch de opdrach um es Vorsj veur te goon beej ’t zjubileijfees dat in november van 't zjubileijjaor plaatsvindt.