Wèrkgroepe

Algemein

'n Vereineging wie de Sjlaaibök kin niks zoonder väöl mètwèrkersj. Daoveur zeen väöl aktiviteite oondergebrach beej versjèllende wèrkgroepe.
Heijoonder tref geer 'n paar veurbeelde van Sjlaaibök aktiviteite. Veer kinne vertille tot dizze lies verre van aaf is -> d'r zin väöl miejer werkgruupkes.

Wie 't geer zuut höbbe veer noch altied extra luij nudig! Mesjiens liek 't uuch ouch leuk um oonderdeil te maoge zeen van zoe 'ne groep. Veer zouwe 't sjiek vinde es geer oos dat eve zouwt wèlle laote weite via de volgende link. Geer kint netuurlek ouch ein van de kontakpersoene heijop aansjpreke. Alvas bedank!

 

Artiestekemissie

Os vereineging heit eige specialiste die alle artieste en orkeste veur os regele. Es veer 'ne kier get sjieks to doon höbbe zörge zie veur de sfeer. 't Is oonmeugelek um al die name op te neume. Os vereineging heit 'n winsj en de kemissie regelt ‘t. 'n gewaardeerde kemissie boe veer hiel gruutsj op zin.

Dansmerietjes

Wèh kint ze neet: de dansmerietsjes van de Sjlaaibök. Sjus wie in Amie es dao boete sjtoon ze in ’t vootleech. Door ‘n oetzeunderleke prizzentasie op dansgebied zörregeze veur ‘n biezeunder oetsjtraoling van de vereineging in zien algemeinheid en in Mesjtreech in ’t biezeunder, aangezeen de Sjlaaibök de einigste Mesjtreechter karnevalsvereineging mèt dansmerietsjes is.

Ze begeleijebeveurbeeld ‘t Groet Prinsepaar beej ‘t nudige bezeuk dat euveral weurt aafgelag en geve de zittinge ‘ne unieke vörrem. In de iersjte jaore van de Sjlaaibök haw de vereineging mer liefs zès dansmerietsjes die wekelijks lès krege in de ballètsjtudio van Wally Haken. Ze ginge op diverze konkoerse in binne- en boeteland en edere kier mèt väöl succes. Eine kier lieverde dat zelfs ‘n Europees kampioene op.

Zjus zoewie in vreuger jaore zien de oetzeunderleke dansprestasies van de dames op de iersjte plaats uiteraard hun eige verdeenste meh neet vergete maog weure tot ouch de trainster dao ‘n oonmisbaar rol beej vervölt. Eder week weurt getraind en kriege de dames “hoeswerk” op. Eder jaor weurt ‘ne nuije dans ingesjtudeerd, dus nuij peskes, meh ouch nuije meziek. Polkameziek is ideaal, meh lang neet edere polka is veur dansmerietsjes gesjik. D’r môt eder jaor weer ‘t nudige zeuk- en sjpeurwerk weure verriech um ‘n passend nummer te vinde. ’t Iersjte officieel optreije van de dansmerietsjes mèt hunne nuije dans is veurbehawwe aan de Nuije Prins van ‘t betreffende jaor.

De kesjtuums môte uiteraard perfek passe, noe, meh ouch ‘t vollegende jaor en ‘t jaor dao op. Eder jaor zien diverze ingrepe daobeej oonvermijdelek en d’r zien hiel get meitersj rezervesjtof daoveur in veurraod. De kemissie is verantwoordelek veur ’t ganse programma van de dansmerietsjes.

Geluidskemissie

geluids

Os vereineging organiseert hiel get feeskes boe veer muziek beej nudig höbbe.

Soms mèt hiel väöl microfoons en soms mèt allein get meziek. Umtot veer altied hiel väöl bezeukersj höbbe volsjteit 'n simpel DJ meubel neet. Veer höbbe dan ouch gezörg veur materiaal boe Giel op de radio zjeloes op kint zeen. Um zoe get te bedene en op te zette mos se dao toch hiel get vanaaf weite. Veer höbbe os eige jonges van 't geluid die dat doon.


Jeug

Wat de Raod van Elf same mèt 't Groet Prinsepaar deit veur de volwassene deit 't Jeugprinsepaar same mèt de jeugraod en de Sjlaaimetsjes veur de kinder. Veur de begeleijing heij van is 'n apaarte kemissie in 't leve gerope; de jeugkemissie

Dizze kemissie kees eeder jaor 'n Jeugprinsepaar mèt gevolg. Zie deit dat zoe ierlek meugelek, zoetot alle kinder in Amie zjus zoe väöl kans höbbe. Oet groep 7 van de basissjaol weurt door loting bepaald wèh veur 't komend sezoen de nuije Jeugprins en Jeugprinses weurt. Zjus wie beej 't groet Prinsepaar weurt dit veurziechtig en hiel geheim gehawwe. Pas beej 't oetrope aan 't eind van de kinderzitting weurt 't volk van Amie in kènnis gesjtèld euver wèh hun dat sezoen zal veurgoon in de Jeugkarneval. 

Oet de kinder van de groepe 7 en 8 van basissjaol Amie, aangevuld mèt hun leiftiedsgenote die in Amie woene meh örreges anders op Sjaol zitte, weurt de Jeug Raod en Sjlaaimetsjes samegesjtèld. Zie begeleije 't Jeugprinsepaar um de Karneval tot 'n succes te bringe.

In euverlègk mèt de Amiese jeugvereineginge weurt door de jeugkemissie 't Karnevalsprogramma samegesjtèld en daonao aan de awwersj geprizzenteerd beej ‘ne georganizeerde Awwersjaovend. De kemissie heit es taak de Karneval veur de Jeug te facilitere en organizere en de Amiese Jeugkarneval in de mies breije zin te bevordere. 

Dat Amie de ganse organizasie van de Jeugkarneval waardeert bliek oet 't groet aantal bezeukersj beej os jeugmiddage en kinderbals. Oondertössje zin väöl kinder groet en sjpele zie of hun awwersj 'n belangrieke rol beej os vereineging.

Wèh de Jeug heit, heit de towkômps

Karnevalsmès

In Amie begint Karneval mèt ’t oplaote van bok Bertsje op zaoterdagaovend. Meh veurtot ’t zoe wied is geit de karnevalsvereineging en ederein met ’t zjuste vastenaovendshart nao de kèrrek.Um 19.00 oor is dan ’n sjpeciaal mès, die (bekans) gans in ’t Amies dialek is: de Karnevalsmès.


Ouch heijveur is ’n kemissie. De Karnevalsmès weurt in z’n gehiel verzörg door ‘ne sjpeciale teksgroep die, in samewèrreking mèt pesjtoer, gepaste tekste samesjtèlt roond ’n thema dat miestal keump oet de Amiese karnevalssjlager van dat jaor. De kemissie sjtreef d'r nao tot ’t koer zoeväöl meugelek leedsjes in ’t Amies dialek zingk. En dat alles op ’n sirrieus basis: ’t is en blijf ’n mès.

Meziek

alt

Eder jaor weure door de bewoenersj van Amie karnevalssjlagersj gesjreve.De meziekkemissie sjtimuleert dat zoeväöl meugelek.
Door de kemissie weurt eder jaor ‘n verkezing georganizeerd um de bèste karnevalssjlager es winnaar oet de bös te laote kome.  Eder jaor weure d’r ‘n aantal sjlagersj ingelieverd van boe oet de kemissie nao deep beraod dreij komposisies sillekteert veur de verkezing. De kemissie beoordeilt de inzendinge op teks en melodie. De gesillekteerde sjlagersj môte oonder andere gesjreve en gekomponeerd zien door luij die in Amie woene of volleges de regels van ‘t regelemint ‘n bepaalde binding mèt Amie höbbe. De vertrouweskemissie, ‘n klein oonderdeil van de meziekkemissie, kontroleert dat beej de dreij gesillekteerde sjlagersj. ‘t Regelemint is veur ederein te kriege in de jaorlekse periode tot sjlagersj kinne weure ingesjik. In de Amyer Praot weurt dat altied oetgebreijd bekind gemaak. Regelemint en insjriefformuleer kint geer ouch heij downloade.

De oeteindeleke käös weurt bepaald door ‘t publiek dat beej de jaorlekse verkezing van de karnevalssjlager in de Amyerhoof aanwezig is. Dat gebäört op ‘t Ajd-Prinsebal. ’t Inzende van de sjlagersj gebäört in ‘t geheim. Behalleve de vertrouweskemissie verneume zelfs de lede van de meziekkemissie pas nao de finale, tegeliek mèt ‘t publiek, de name van de tekssjrijversj en komponiste. Heijdoor is invloed door de meziekkemissie ten gunste of in ‘t naodeil van de inzender dan ouch volledig oetgesjlote. Daoneve zörg de kemissie veur ‘t versjpreije van teks en blaadmeziek van de winnende sjlager, ‘t laote opneume van ‘ne cd, ’t op tied versjpreije van dei cd beej kaffees, sjaole, ander kemissies enzoemie en ‘t promote van de Amiese karnevalssjlagersj in ‘t algemein.

Optoch en Zjurie

Optoch is oonlosmakelek verboonde aan Karneval en in Amie hèlt dat in tot al vanaaf de beginjaore van De Sjlaaibök väöl groepe en wagele in ‘n sjtoet door 't dörrep trèkke.

‘n Aafzeunderleke kemissie is belas mèt de komplete organizasie van dei optoch en ‘t oetgeve van prijze aan de deilneumersj. De kemissie heit ouch es taak um d’n tradisjionele karnevalsoptoch in iere te hawwe en daoveur probeert ze luij aafzeunderlek, meh ouch vereineginge en bekinde groepe te sjtimulere um aan d’n optoch mèt te doen.

De Sjlaaibök vinde tot d’n optoch ‘n wezelek deil oetmaak van de karneval en tot dit ouch zeker môt blieve besjtoon. D’n optoch weurt door de kemissie veurbereid, zoe wie ’t bepale van de roete, ’t bevordere van meziek en versering langs de roete, ’t indeile van de deilneumersj, ’t naogoon van de veiligheid en zoe mie.

De optoch weurt ouch door de kemissie begeleid; ’t tôwziech hawwe op reklame en ’t eventueel oetgeve van artikele oonder d’n optoch.
En in euverlègk mèt de peliesie en verkiersjregeleirsj ’t drage van de zörg veur de algemein veiligheid van d’n optoch. Ouch weurt d’r op gelèt tot d’r gein kwetsende of oonierbaar oetbeeldinge in d’n optoch aanwezig zien. Ein van de middele um d’n optoch te sjtimulere is ‘n wedstrijdillemint dat is ingebouwd. ‘n Zjuriekemissie sjteit links en rechs verdèk opgesjtèld langks de roete en guuf 'n beoordeiling van de deilneumersj en wagele. Nao aafloup van d'n optoch weurt door ‘t Prinsepaar aan de “bèste” ‘n pries oetgereik.

Ouch al heit edere optoch zien memorabel meminte, d’n optoch van 1969 is waal ‘ne apaarte geweis: d’r laog ’n giganties pak sjnie en d’r waor absoluut gei verkier meugelek. D’r kôs geine oto mie reje en de mieste optochte in ’t land woorte aafgelas. Meh neet in Amie: Hay Kikken mèt zien dreij kollega’s Bèr Cuenen, Jef Goyen en Lewieke Sour zörregde deveur tot de ganse roete veur d’n optoch zuver waor. Tot de Prinsewagel toen op ’t lèste toch nog in de sjnie kaom vas te zitte, waor ech neet hún sjöld.

De zjurielede weure door de optochkemissie benump. ‘t Zjurere van deilneumersj aan d’n optoch gebäört volleges door de kemissie te bepale regels. Daoveur hèlt me veuraafgaond aan d’n optoch zjurie-euverlègk. D’n oetsjlaag van de zjurering weurt nao aafloup van d’n optoch mètein mètgedeild aan de veurzitter van de vereineging en daonao door de Prins bekind gemaak aan ’t groet publiek.

De lede van de zjurie weure veur ’t publiek geheim gehawwe.

Peersjkemissie

 

Neet allein roond de karnevalsdaag meh ouch wied daoveur, eigelek ‘t gans kelenderjaor, laote de Sjlaaibök regelmaotig van ziech hure in de vörrem van publikasies en artikele. De vereiste tekste zien neet allein besjtump veur allerlei affiesjes, daagblajer, ‘t wiekblaad Amyer Praot en ‘t vereinegingsblaad ‘t Sjlaaiboknuijts, meh ouch veur  ander doeleinde zoewie de zier gewaardeerde jaorleks terökkierende karnevalslès op de basissjaol. 


Peersjcie


Oos Peersjkemissie is beej al die aktiviteite gewoen neet mie weg te dinke. De kemissie heit es taak alle publikasies van de vereineging, veur zoewied die neet in ‘t biezeunder zien tôw geweze aan ‘n ander kemissie, in samewèrreking mèt ‘t besjtuur te verzörrege. Dat hèlt in:

‘t samesjtèlle van artikele veur gezètte, wiekblaad Amyer Praot en ander media mèt betrèkking tot aktiviteite van de vereineging
’t samesjtèlle en laote drökke van tekste veur affiesjes
‘t samesjtèlle van tekste veur veurliechting op sjaole en dergeleke
‘t samesjtèlle van ’t vereinegingsblaad van de vereineging, ’t Sjlaaiboknuijts, dat 4 á 5 kier per karnevalssezoen versjijnt
‘t  oonderhawwe van de website van de Sjlaaibök
boe nudig ’t vertale van Hollandse tekste in ’t Amies dialek

 

Plein

Dis kemissie heit de verantwoording euver de ganse organizasie van de eupening van Karneval. Dit gebäört op ‘t Sievereplein, beej ‘t Sjlaaibokmonemint, mètein nao aafloup van de Karnevalsmès op zaoterdag veur ‘t fees van de dreij döl daag. 't Lieuwedeil van de organizasie van dit gebäöre ligk in han van de Ajd-Prinsegarde. In samewèrreking mèt ‘t vereinegingsbesjtuur (veurzitter en vice-veurzitter) weurt jaorleks ‘t programma van dis feesteleke eupening doorgenome.

Dat programma begint mèt ‘n feesteleke sjtoet van de kèrrek nao ‘t plein. Daoveur deent de roete te weure bepaald, môt gezörg weure veur verkiersjregeleirsj en vreug de volgorde van opsjtèlling um de nudige aandach. t Zien ummersj nogal get groepe die heijaan deilneume:
sirremoniemeister, ‘n dillegasie van de Ajd-Prinse (boebeej de Prins van verleje sezoen) die de wagel mèt de sjtraks op te hange Bok mèttrèkke, de hofkapel, de voltallige jeuggroep, de Raod van Èlf mèt de dansmerietsjes en ‘t Nuij-Prinsepaar in hun midde, ‘n Zate Herremenie, de Ajd-Prinsegarde mèt dames, de dames van de Raod van Èlf en es zeker neet oonbelangriek sjlot van de sjtoet: ‘t volk van Amie dat popelt om aan de geng te goon. Eder jaor goon d’r ummer miejer luij mèt de Sjlaaibök mèt en sjteit ‘t beej de fôntein bômvol mèt sjtartlöstige karnevalsvierdersj.

Op ’t plein weurt vanaaf 'ne ope wagel de ganse sjtoet welkom geheite door de veurzitter van de Ajd-Prinsegarde, boenao de veurzitter van De Sjlaaibök die taak euvernump. De Prins sjprik vervolgens nao ‘t volk nogmaals zien belofte oet d’r ‘n geweldig Karnevalsfees van te goon make. Heijnao weurt oonder ‘t hijse van de Amiese vlag ‘t eige volksleed gesjpeild en gezônge.

Nao dis plechtige eupening is ‘t de bäört aan de Prins van ‘t aafgeloupe sezoen. Heer leus veur ‘t froont van de Ajd-Prinsegarde en alle aanwezige de proklemasie veur, boemèt heer zien take en belofte es lid van dit eksluzief gezèlsjap bekrachtig. Bedolve door ‘ne konfettierege en begeleidt door rôffelende trômmele krijg heer daonao zien eige prinsesjteek op de kop gezat, boemèt opname in de Ajd-Prinsegarde ‘n feit gewore is.

Oonder ‘t sjpele van ‘t vigerende Karnevalsleed beklump de “echte” Prins van De Sjlaaibök de kabien van ‘ne hoegwèrreker, boe in heer tot in ijle huugde weurt gebrach um mèt officiële daad De Bok aan de installasie te bevestige. Heijbeej weurt ‘t volk beregend mèt groete hoeveelhede konfettie, es oondertössje mèt sjitterend en knallend vuurwerk de Karneval weurt ingesjote. Hoeg bove ‘t volk hingk dan dreij daag langk De Bok, d’r op oetkiekend tot ederein dreij daag langk plezeer maak beej ‘t fees der feeste.

Op Karnevalsdinsdag, um 24.00 oor persijs, is ederein weer op ‘t Sievereplein prezent. Sômmige probere mèt hun lèste krachte al zingend en dansend ‘t volk nog eine kier op te zjwiepe, andere laote einigszins ‘t vermeujde köpke al ‘n bitsje hange. Ummersj, nao ‘n dankwoord van de veurzitter van de vereineging takelt Prins Karneval op dit tiedsjtip mismeujetig De Bok weer veur ‘n jaor nao oonder, es teike tot ‘t Karnevalsfees zien daverend einde heit bereik. In gemeinsjapshoes Amyerhoof vindt heijnao ‘n sjlotmanifestasie plaats, boe in alle aan Karneval deilneumende groeperinge nog ‘ns ‘ne kier door Prins en vereineging dankend in ‘t zunneke weure gezat.  Tege de klok van twie oor sjnachs weurt aldus ‘t lèste Karnevalskeertske langksem oetgebloze en trèkke ouch de lèste feesvierdersj meug meh tevreije nao hoes.

Oet bovesjtaonde bliek tot e.e.a. nogal get veurbereijinge verg. Gei woonder tot behalleve hiel get Ajd-Prinse ouch de nudige mètwèrrekersj heijaan hun sjteinsje beejdrage. In de lèste karnevalsnach zien de kemissielede dan nog zèlfs in hun einsje aan ‘t wèrreke.

Prinsekemissie

D’r zien hiel get Amiese hiere en dames die geir de rol van Prins of Prinsepaar van De Sjlaaibök zouwe wèlle vervölle. Heij prijs de vereineging ziech gelökkig mèt, umtot dit aanguuf tot de organizasie van de Amiese Karneval in gooj aarde vèlt en door väöl luij vanoet tradisie gedrage weurt.

‘t Prinssjap weurt echter door De Sjlaaibök neet zonder mie gezeen es ein of ander ierebäönsje. Prins en Prinsepaar dene toch hiel get in hun mach te höbbe om de periode van karneval good te kinne doorsjtoon en hun take nao behure te kinne vervölle. Dao maog toch ech neet te liech euver weure gedach: ‘t is ummersj hiel get miejer es in ‘n sjiek kesjtuum op ‘n verhuging bove ‘t volk oet te torene. De complexe organizasie en de väölheid van aktiviteite van De Sjlaaibök maoge tot aangeven.

 

'n Amies Karnevalsprinsepaar is neet allein ‘n jaor lang “ ‘t geziech” van De Sjlaaibök, ze guuf veural ouch leiding aan ‘t ganse karnevalsgebäöre boe beej ze vanaaf hunne figuurleke ivore tore toch veural in deens sjtoon van de ganse karnevalsvierende gemeinsjap. Neve ‘t vervölle van hun pliechte dene ze dit ouch in woord en gebaar volop te demonstrere, terwijl hun gedraag weurt bepaald door de vereinegingskadersj en de algemein geldende norme en weirde van de maatsjappij. Netuurlek oontvange ze beej ‘t oetveure van hun neet te oondersjatte take de volledige oondersjteuning van de vereineging in häöre ganse umvangk.

 

Biezeunder is tot ‘n Amies Prinsepaar dis take ‘n gans jaor deent te vervölle. Ze weure vief weke veur Karneval benump en geïnstalleerd en geve de daobeej behurende scepter allein mer aaf aan hun opvollegersj. Op dis meneer kin dit teike van wierdigheid dan ouch neet terechkome in neet-Prinseleke han!

 

Wie weurt noe iemes Prins van Amie?

In prinsiep kin edere inwoener van Amie dei aan bovesjtaonde voldeit heijveur in aanmerreking kome. Geld sjpeilt heijbeej gein rol, umtot de koste van de ganse organizasie en alles wat daobeej huurt door de vereineging weure gedrage. Dat wèl echter neet zègke tot de Prinsetaak noe gaar gein persoenleke koste mèt ziech mèt drage.

 

Edere inwoener van Amie, waal of gein Sjlaaiboklid, kin ‘t gans jaor door eine of miejer kandidate veursjtèlle. Dat kinne (oon-)getrouwde (ech-)pare zien, meh ouch oongetrouwde Prinskandidate. Vereiste heijbeej is tot ze de wèl en ‘t vertrouwe in ‘t oetoefene van hun tôwkômpstige take beej De Sjlaaibök bewus höbbe oetgesjproke of daovan in de praktijk höbbe bliek gegeve.

 

Alle kandidate weure in de Prinsekemissie, die besjteit oet versjeije ervare lede van de vereiniging, besjproke boenao via consensus of d.m.v. sjtumming ‘n käös weurt gemaak.

 

Kandidaatsjtèlling en käös dene netuurlek in ‘t groetste geheim te gebäöre. Ouch oonder ‘t verriechte van alle veurbereijinge is dit geheimhawwe ‘n iersjte zjwoer pliech. Beej oetlekke van dit geheim nump de prinsekemissie ziech ‘t recht veur de kandidatuur of benadering oongedoon te verklaore. Tot aan ‘t memint van oetrope blijf dit geheim beej ‘t beperk aantal lede van de prinsekemissie beröste! De prinsekemissie lègk v.w.b. hun besjlissinge allein mer verantwoording aaf aan ‘t besjtuur en deit dat in naam inkel nao de installasie van de gekoze kandidaat.

 

Um in aanmerreking te kome veur ‘t Prinssjap gelde bepaalde zake van aandach, boevan d’rsj heijoonder ‘n hampfel genump weure:

 

Es iersjte môt de kandidaat woene binne de dörrepsgrenze van Amie en ‘n bepaolde bekindheid höbbe in dis gemeinsjap. ‘t Sjpreke van ‘t (plaatselek) dialek is daobeej ‘n vereiste. Ouch deent de kandidaat ‘n zeker verdeenste binne de Amiese gemeinsjap te höbbe. ’t Is gunstig es de kandidaat lid is van ein of miejer plaatseleke vereineginge. Netuurlek deent heer karnevalesk te zien ingesjtèld en De Sjlaaibök ‘n werrem hart tôw te drage. ‘t Is vanzelfsprekend tot een eventueel lidmaatschap beej ‘n ander karnevalsvereineging es De Sjlaaibök edere kandidatuur oetsjlut.

 

Beej veurkäör dene kandidate aanhang te höbbe in alle lage van de Amiese bevolleking en te besjikke euver redeleke tot gooj kommunikatieve vaardighede. ‘t Sjprik vanzelf tot allein mèt ‘n gooj gezoondheid en ‘n bepaald oethajdingsvermoge de nudige take door ‘t tôwkômpstig Prinsepaar of Prins vervölt kinne weure.

 

‘n Dèkser gehuurde misvatting is tot kandidate in de veurmalige gemeinte Amie geboren zouwe môte zien. Dat kint vandaag d’n daag besjlis geine noedzaak mie zien. Ummersj, es kandidate voldoen aan bovegesjtèlde, bewieze ze daomèt hun lidmaatsjap en draagkrach in de gemeinsjap Amie.

 

De prinsekemissie dreug dus op de iersjte plaats de zörg veur ‘t vinde van ‘n gesjik Groet Prinsepaar. Daoneve valle alle daomèt samehangende gebäörtenisse oonder häör verantwoording zoewie ‘t veurbereije van ‘t Prinsepaar op häör tôwkômpstige take, ‘t Protokol beej de beneuming en installasie, ‘t veurbereije van de Inaugurasiespeech, de Prinselijke Proklemasie en gangk zoe mer door.

 

Eder èlfde vereinegingsjaor heit de kemissie ‘n sjpeciaal taak:

de kemissie deent dan oet de tien veurige Prinse ‘ne Vorsj te keze oet de veuraafgaonde tien Prinse. De Vorsj krijg neve zien take es Prins ouch de opdrach um es Vorsj veur te goon beej ’t zjubileijfees dat in november van 't zjubileijjaor plaatsvindt.

Sjlaaiblaad

Oonder verantwoordelekheid van de kemissie Sjlaaiblaad keump vlak veur de karnevalsdaag, op ‘t Nuij Prinsebal, karnevalsgezèt "’t Sjlaaiblaad" oet, dat in Amie graties hoes aan hoes weurt versjpreid. Oongeveir veer persoene vörreme ‘n min of mie vaste redaksie die d’r veur zörg tot eder jaor ‘n Sjlaaiblaad oetkeump boe in op ‘n luchtig gesjreve meneer ‘t reile en zeile in Amie op de hak weurt genome.

Op de iersjte plaats is ‘t de bedoeling tot de luij ‘ns good kinne lache euver de aangehaolde Amiese dörrepspôlletiek of de meneer boe op dat veur ‘t vootleech weurt gebrach.

De kemissie bepaalt zelfsjtandeg vörrem en inhajd van ’t blaad, boe väöl teikeninge en foto’s beej weure gebruuk. Veur de luij die neet van alle typies Amiese gebäörtenisse op de huugde zien blijf nog genoeg euver um te lache es ze de ganse serie veersje möpkes doorneume, boe ‘t redaksieteam eder jaor tot euver de grenze nao op jach geit.

In ‘t Sjlaaiblaad weure netuurlek ouch de nuij Prinsepare en ‘t jaorleks programma van de dreij döl daag geprizzenteerd. ‘t Sjlaaiblaad is 'ne vörrem boemèt de karnevalsvereineging probeert ‘t Amies dialek oonder de bevolleking werrem te hawwe. De Sjlaaibök zien gruutsj d’r op tot ze eder jaor weer d’r in sjlage ‘t Sjlaaiblaad advertensieloos kinne oetgeve. Alle Sjteunbök sjtoon op ‘n apaarte pagina in de karnevalsgezèt vermeld.

In ‘t Sjlaaiblaad bevindt ziech altied ‘t oondertössje bekinde "tuutsje" dat versjeije daag nao ‘t oetbringe weer weurt opgehaold. ‘t "Tuutsje" weurt gevöld mèt ‘n vrijwèllige financieel beejdrage van de lezersj.
D’n opbringks is besjtump veur de kranke dörrepsgenote die in dat jaor neet aan de karneval kinnen mèt doen.

Sjlaaimettetreffe

Sjlaaimettetreffe sjteit veur ‘t oonherkinbaar verkleijd roondtrèkke in Amie op de aovend van karnevalszoondag. De mies waanzinnige kreasies kinste dan in Amie tegekome, van luij allein of in groepsverband. D’r weure dèks mèt allerleij attribute situasies gekreëerd en shows opgeveurd boeste beej zouws zjwere totste mèt toneelsjpelers te make höbs.

Um twellef oor sjnachs weurt in eine van de Amiese kaffees oonder groete belangsjtèlling besjlis wèh "’t bèste" is, ouch al zien de oonderling versjèlle dèks erg klein. Die oonderling versjèlle weure mèt leuke prijze gewaardeerd. De kemissie Sjlaaimettetreffe zörg veur de totaal organizasie van ‘t Sjlaaimettetreffe.

 

Sjteunbök

alt

Wèh de Karneval in Amie ’n extra werrem hart tôwdreug kin de vereineging finansjieel sjteune en is ‘n jaor langk "Sjteunbok". Dao sjtoon uiteraard ‘n aantal faciliteite tegeneuver: ‘n heus regelemint van goodgetèld 11 Sjteunbokartikele.  

 Eint daovan verdeent apaarte vermelding: ‘n jaorleks obbenuijts oontworrepe Sjteunbokmedaljel. Neet allein ‘t make van die medaljel meh ouch ‘t verzörrege van de gewinsjde PR en ‘t kôntak mèt de sjponsor vindt plaats oonder verantwoordelekheid van de kemissie Sjteunbök.
Klik heij veur 'n veurbeeld van de medaljele

 

vastevure

Este de historie van de karneval in duuks keumpste diverze verklaoringe tege veurwat luij al ruim veur oos jaortèlling karneval vierde. Die verklaoringe zeen: ’n nuijjaorsjfees, ’n vröchbaarheidsfees (godebroelof) en ’n initiatiefees (euvergangksrite boemèt jôngere weure opgenome in de sjtam van de awwere). Ein punt höbbe die verklaoringe dèks ’t zelfde: ’t heit te make mèt ‘ne euvergangk nao get nuijts, boe vuur ’n belangrieke rol beej sjpeilt um dat te oondersjtriepe en krach beej te zètte. Vuur symbolizeerde ’t verdrieve van ’t koed meh ouch ’t oprope van vröchbaarheid en nuij leve. ’t Vastevuur woord en weurt op versjèllende menere geuit: fakkels in de fruitweie, 'n brannend raad van ‘ne berg aaf laote rolle, brannende sjanse, of zoewie de Sjlaaibök dat doen: ’n pôp van sjtru in brand sjteke.

Versjeije ieuwe geleje kôs Mesjtreech ouch ’n vastevuur es ritueel, meh dat woord in 1672 verboje umtot toen in eine maond tied ’n kloester (aan de Bonnefantesjtraot) tot dreij kier aan tôw in brand vloog. Ouch al bleek later tot dat niks mèt ’n vastevuur te make haw meh mèt ‘ne brandsjtiechter, toch woord de tradisie veur zoewied veer ’t weite daonao noets mie veurtgezat.

De Sjlaaibök höbbe de tradisie sinds 1998 in Amie mét de karnevalsdaag oonder groete belangsjtèlling in iere hersjtèld. Op karnevalszoondag weurt in de buurt van de Prinseleke Rizzedensie um 12.11 oor mèt ´n aantal sirremonieel gebruke 'n sjtruje pôp in brand gesjtoke. Die pôp luustert nao de naam Fikkie. De vlam weurt in ´n lempke (mèt theeliechske) euvergebrach nao alle “heilige huiskes” (kaffees in Amie) um dao mét de karnevalsdaag achter ´t buffèt ´n besjermend en inspirerend leech te geve.

Eder jaor weurt ´t aantal belangsjtèllende beej de “brandsjtapel” groeter en ouch eder jaor weure d´r nuij illeminte aan de sirremonie tôwgevoog. Beveurbeeld es ´t lempke aan de kastelein weurt euvergedrage weurt d´r sinds kort ´n “vastevuurdröpke” beej ingesjoonke. Op dinsdagaovend weure de lempkes beej de heilige huiskes opgehaold en same mèt de kastelein oetgebloze.

Wandele

Boete Karneval um kint de vereineging al sinds ‘n lang reeks van jaore ‘n wandelkemissie die eder jaor in de direkte umgeving van Amie ‘n wandelroete oetzèt. De wandeleirsj zien van edere leiftied en kome vanoet de ganse umtrèk nao Amie um te kinne wandele; sômmige kome zelfs van twie provinsies weijerop! Veer weite neet beter es tot me mèt lof euver de wandelroetes sjprik. Behalleve tot de roetes trèkke door de sjoen en natuurleke umgeving van Amie, zeen de wandeltochte ouch ’n succes vanwege de zörg die de organizasie d’r aan besjteijdt.  Neet allein ‘t oetzètte meh alles wat mèt ‘ne profesjionele wandeltoch te maken heit weurt door de kemissie verzörg, zoewie sjtartbewieze, kontroleposte, beweegwijzering, konsumpsieversjtrèkking en zoe mie.

Dis kemissie heit de zörg veur de totale organizasie van ’t wandelgebäöre en oonderhèlt de kôntakte mèt de wandelboond.

Website en Sociale Media

In deze tijd kan ook c.v. De Sjlaaibök niet achterblijven bij het gebruik van de moderne communicatiemiddelen om leden, medewerkers en geïn­teresseerden te informeren over onze vereniging.

De commissie Website heeft de gehele geschiedenis en organisatie van onze vereni­ging gedigitaliseerd, voorzien van historische en actuele foto’s en in een goed leesbaar model - in dialect zowel als “Nederlands”- op het wereld­wijde web gezet. Ook de meest actuele informatie is er te vinden, terwijl doorgelinkt kan worden naar onze hofkapel “Beejeingesjraveld” en andere interessante, Ambyse en carnavaleske websitepagina’s.

Websitebezoekers die zelfs vanuit andere wereld­delen onze site bezoeken onderstrepen de grote belangstelling.

Taak van de commissie is om te zorgen voor het algemeen beheer van onze verenigingssite en te zorgen voor actuele informa­tie­verstrekking. Dit laatste gebeurt m.n. in het seizoen vrijwel wekelijks of zelfs dagelijks.

Zaal en entree

De naam van de kemissie liet aan dudelekheid niks te winsje euver: ‘t heit alles te make mèt es geer örreges nao binne wèlt kome. ‘n Groet aantal door De Sjlaaibök georganizeerde aktiviteite zien vrij van entreekoste. Echter ‘ne inkele kier môt d’r waal ‘ns veur d’n entree betaald weure, wèlle veer intern geine ruijzing kriege mèt de penningmeister. De karnevalszittinge zien dao ‘n veurbeeld van.

De Sjlaaibök sjtoon bekind um de karnevalszittinge, neet allein vanwege ‘t geboje programma meh ouch vanwege de totale organizasie dao um heer. D’r weurt ummersjkier nao perfeksie gesjtreef en dao is de zaal- en entreekemissie ‘ne belangrieke sjpeler beej.

De kemissie is verantwoordelek veur de inriechting van de zaal, de garderobe, de kleidkamersj, de kaartkontrol, ‘t begeleije van de bezeukersj aan de zittinge nao hun zitplaats, ‘t verveur van en nao hoes van minder valide bezeukersj en ‘t assistere beej zaaltôwziech. Names de vereineging heit de kemissie de verantwoordelekheid um alles wat mèt keertsjes en zitplaatse te make heit perfek te laote verloupe. Vindt geer in ‘t duuster eur zitplaats neet mie terök? Ze kome uuch hellepe. Kômp geer nao aafloup get lestig beej eure taxi? Ze neume uuch oonder d’n erm. Ze zien altied boe ze verwach weure en de vereineging deit noets tevergeefs ‘n beroop op ze. Oondanks tot de kemissie neet zoe op de väörgroond sjteit verriech ze veur de vereineging oonmisbaar werrek.

Zittinge

De vereineging is d’r gruutsj op tot ze es ein van de wienige karnevalsvereineginge, en dat geldt veur volwassene en veur de jeug, eder jaor ‘n aantal karnevalszittinge kin prizzentere die allein mer door entoesjiaste vrijwèlligersj van eige bojem (inwoenersj of ex-inwoenersj van Amie) weure vörrem gegeve.

Dao zien d’rsj hiel get terech zjeloes op.
De kemissie Zittinge besjteit oet ‘n behuurlek aantal mètwèrrekersj en zörg veur ‘t volledig programma van de zittinge van A tot Z, mèt alle techniese aspekte dao um heer: ’t beoordeile van tekste, ‘t begeleije van deilneumersj, ‘t grimere, soefflere en gangk zoe nog mer eve door. Zelfs ‘ne taxideens veur publiek dat minder valide is weurt door de kemissie geregeld.

De kemissie heit ‘n apaarte groep, dei zich hoofzakelek mèt de jeugzitting bezig hèlt en boe dat winsjelek is de jông, aankomende artieste oondersjteunt en begeleidt.

Vanaaf oktober/november beginne al de iersjte veurbereijinge, want d’r weurt niks aan ‘t tôwval euvergelaote. In totaal weure d’r zès zittinge georganizeerd: 2 galazittinge, 1 seniorezitting, 1 jeugzitting, en 1 zitting in ‘t Amies Zörgcentrum (bejaardehoes).