Peersjberiech van ’t Gruutsj Jeugprinsepaar 2026-2027 van C.V. de Sjlaaibök
Op Zoondag 8 November 2026 woort in Gemeinsjapshoes d’n Amyerhoof oetgerope tot:
68ste Jeugprinsepaar van C.V. de Sjlaaibök.
_____________________________________________
C.V. de Sjlaaibök heit de ier uuch ’t Jeugprinsepaar van 2026-2027 veur te maoge sjtèlle.
Prins Lou d’n 2de
Prins Lou d’n 2de is de ajdste zoon van Stefan en Denise Moens, en woent same mét zien breurke Vic op de Westrand. Ozze prins helt wel van ’n feeske en vind karneval viere supersjiek. Zoewel in Amie és in Mesjtreech is heer te vinde, aangezeen zien awwersj lid zeen van de Kachelpiepers. Mér dit jaor zalle zie veural in Amie te vinde zien noe ziene groetste druim in vervulling geit. Prins Lou is lid van voetbalclub RKASV en is daoneve geire met zien vrundsjes boete. Ouchzalt geer häöm soms kinne tege kaome op de tribuun van MVV, boe heer de sjpelers naor de euverwinning sjrieuwt. Prins Lou is ech ’ne leve, zörgzame jong en ouch altied wel in veur ’n grèpke. Boe heer ouch groete fan van is, is Flemming, mer zal heer de komende tied “automatisch” parkere, en karnevalsmeziek goon dreije. Dat ‘r dit groete geheim mós beware veur zien breurke Vic, mer ouch veur ziene béste vrund Ruud voont heer toch wel sjpannend.
Prinses Zara
Prinses Zara is de dochter van Ludo en Wendy Vinck en woent same mét häör pap en mam en häöre hoond Juul in de Doomhoeve. Zie en häör awwersj zeen gein oonbekinde in ós dörp, ze viere al jaore same met hun vrundegroep Super- Maan de karneval zoewel in ’t dörp es in Mesjtreech. Ouch höbbe ze de nuudige jaore cáfe Ammezasie gerund. Os prinses heit al jaore eine groete druim, en dat waor toch wel DE prinses weure van de Sjlaaibökskes en Sjlaaimetjes. Dat häöre druim dit jaor heit maoge oetkome, én häör beste vriendinneke Livia bij häöre raod zit vind zie dan ouch mie dan supersjiek. Prinses Zara is lid van de hockey heej in Amie en sjpeilt dao op hoeg niveau. Ouch kint geer häör al jaore höbbe zeen optreije op ós eige Kinderzitting. Os prinses is ’n hiel leef, zörgzame dame, en erg gedreve in al boe häör intresses ligge. Ze is zoe gek op bieskes , en häöre hoond Juul is dan ouch häör alles, häöre béste vrund. Os prinses is gek op sushi en lekkere borrelplènkses en helt dus van väöl gezelligheid. Grèpkes oethole kint ze ouch hiel good , mèr de groetste “grap“van al, ’t motte verzjwiege én lege van dit sjieke geheim is noe veurbij!
Same kint ós Prinsepaar neet wachte um te goon feeste en hope zie uuch heej of dao te maoge tegekome en d’r same ein groet fees van te make.
TITELATUUR JEUGPRINSEPAAR 2026-2027
Prins Lou d’n 2de
Baron van de Westrand tot aan de Gravesjtraot
Pingelkeuning van de jeug van RKASV
Ginneraal van alle Minecraftwerelde
Iere- opziechter van de Boschpoorttribuun
Groetmeister van de Pizzarette
Prinselijke naozaot van Sjtadsprins Lou d’n 2de
Prinses Zara
Hertogin van de Doomhoeve tot aan Tina
Keizerin van de hockeyvelde aan de Geusselt
Markiezin van de heldere zangk
Gravin van de sushi en lekkere plènkskes
Barones van de polonaise en ‘t fees tot in de late eurkes
Besjermingel van de leefste Juul