De Jeugkarneval in Amie besjteit in 2024 al 66 jaor. Dat mós netuurlek gevierd weure! Dudeleke kemissie toch? ’t Zjubileijcomité vertelt euver ’t zjubileijweekeind!
Tradities moste iere,
Zjubileijs móste viere!
Vol enthousiasme aan de sjlaag!
Vol enthousiasme ginge veer es feescomité aan de sjlaag um ’t iersjte weekeind van november 2024 “Groet & Sjiek” mét allerhande activiteite te völle, mèt es doel neet allein ‘n geweldig weekeinde te organisere meh ouch um geld euver te hawwe veur de kinderkarneval in Amie. De ideje die veer hawwe kraoge al vrij gaw vorm, mede door de enthousiaste mètwèrking van luij van binne en zelfs ouch van boete ós dörp. De sjpringmiddag veur de kinder op zoondagmiddag waor gaw geregeld. De groetste oetdaging laog beej ‘t organizere van de feesaovend, boe “Back 2 the Freem”, same mèt “Anderkovver”, de publiekstrèkker zouw móte weure. Sjus dei feesaovend, op zaoterdagaovend veur de groete luij, mós ummersj de mieste cent in ’t luijke goon bringe. Binne twie daag waore al 300 kaarte verkoch. De ander 100 kaarte, in combinasie mèt gevarieerde sjponsorpakkètte, volgde gaw.
Wow, gelök dus!
Óze druim tot ‘ne bomvolle Amyerhoof de groetste inkomstebron van ’t feesweekeind zouw weure kaom noe waal erg kortbeej. Veer woorte echter nog mie verras, want de finansjiële sjponsoring door versjeije stiechtinge, bedrieve en particuleer oonderneumersj die daonao volgde hawwe veer ech neet verwach!
De jeuggroep in ’t nuij!
De jeuggroep is door sjponsoring van de Ajd-Prinse van Amie bekans gans in ’t nuij gesjtoke: 30 nuij jes, 30 nuij witte polo’s en veur de jónges van de jeugraod allemaol ’n nuij brook.
Gewèldige opbringks
Door de opbringks vanoet dit feesweekeind höbbe veer óze sjtein dao aan beej gedrage. Gruutsj kinne veer “sjtein” i.p.v. “sjteinsje” zègke, want veer höbbe ‘ne cheque kinne euverhandige van €16.400,00! Daobeej kriege de jónges van de jeugraod volgend seizoen ouch nog allemaol ‘ne nuije cape. En… veer goon ouch nog probere te regele tot d’r twie nuij prinsepèkskes kome, want dat is ouch nog nudig. Es dat dan ouch nog lok sjteit óze jeuggroep d’r de komende jaore weer prachtig op. De jeugkarneval maog ummersj noets verlore goon.
Feesaovend met Back 2 the Freem
De feesaovend met “Back 2 the Freem” & “Anderkovver” waor te gek. Wat ’n fees, zègk! En wat ’n awwerwètse gezelligheid. De jeugmiddag waor minder drök, meh ouch leuk en gesjlaag. Es klap op de vuurpijl kóste veer és zjubileijcomité ‘n prachtig kedo euverhandige op dei zondagmiddag. Wat waor dat ’n verrassing: vanaaf noe trèk óze jeuggroep oet met ’n eige vaandel. Jean-Paul Bremen heit ’t frame gesjponsord en mevrouw Maria Op den Camp heit ‘ne prachtige drappeau gemaak. Veer zien Jean-Paul en Maria heij hiel dankbaar veur.
Jeug van Amie,
Mèt dit alles kint geer mèt ’n gerös hart door nao de volgende 11 jaor: op nao 7 x 11 jaor jeugkarneval in Amie! Ammerzeert uuch de komende 11 jaor, goeit uuch de door in de sjoenste tied van ’t jaor. Laot ’t Amies blood van 11 november tot asgoonsdag door eur preijkes kroepe!
Veer höbbe met hiel väöl plezeer heij veur uuch allemaol ós bès veur gedoon.
Veer bedanke ederein dei ós op welke meneer dan ouch daobeej geholpe heit.
Amie alaaf!
Zjubileijcomité 6 x 11 jaor jeugkarneval Amie:
Caroline, Monique, Lilian, Ilona & Annelies
(op de foto van links nao rechs same met Monique, veurzitster Jeugkarneval Amie)
